പരിശുദ്ധാത്മാവിന്റെ സഭയിലെ പ്രവർത്തനങ്ങളെപ്പറ്റി ഫ്രാൻസിസ് മാർപ്പാപ്പ ഇങ്ങനെ എഴുതി: "പിതാവിനും പുത്രനും ഇടയിലുള്ള സ്നേഹബന്ധമെന്ന നിലയിൽ, പരിശുദ്ധാത്മാവ്, ദൈവജനത്തിന്റെ കൂട്ടായ്മയെ കെട്ടിപ്പടുക്കുകയും, വൈവിധ്യമാർന്ന ദാനങ്ങളും വരങ്ങളും അവർക്ക് നൽകുകയും ചെയ്യുന്നു. കൂദാശകളിലൂടെ, ക്രിസ്തുവിന്റെ മൗതികശരീരത്തിലെ അംഗങ്ങൾക്ക് ആത്മാവിൽ നിന്ന് ദാനങ്ങൾ ലഭിക്കുന്നു. ഇത് സഭയുടെ ആത്മികവർദ്ധനയ്ക്കും സുവിശേഷ പ്രഘോഷണത്തിനും വേണ്ടി പ്രയത്നിക്കാൻ അവരെ പ്രാപ്തരാക്കുന്നു". പരിശുദ്ധ ത്രിത്വത്തിലെ മൂന്നാളുകളിൽ നമ്മുടെ പ്രാർത്ഥനകളിലും വിചിന്തനങ്ങളിലും പഠനങ്ങളിലും ഏറ്റവും കുറവ് കടന്നുവരുന്നത് ഒരുപക്ഷേ പരിശുദ്ധാത്മാവായിരിക്കും. വിശുദ്ധ ഗ്രന്ഥത്തിൽ നോക്കിയാലും പരിശുദ്ധാത്മാവിനെക്കുറിച്ചുള്ള വചനങ്ങൾ താരതമ്യേന കുറവ് തന്നെ. സഭയുടെ ജീവിതത്തിലും ദൗത്യത്തിലും പരിശുദ്ധാത്മാവ് വഹിക്കുന്ന പങ്ക് അനിർവ്വചനീയവും അതിരുകൾ ഇല്ലാത്തതുമാണ്. എന്നാൽ, പരിശുദ്ധാത്മ ഭക്തിയിലും ആത്മാവിന്റെ പ്രചോദനങ്ങൾ വിവേചിക്കുന്നതിലും വർത്തമാന കാല സഭ ചിലപ്പോഴെങ്കിലും പിന്നോട്ട് പോകുന്നുണ്ടെന്ന് തോന്നുന്നു. ഈ ശ്ലീഹാക്കാലത്ത് പരിശുദ്ധാത്മാവിന്റെ സഭയിലേയും, പ്രത്യേകമായി നമ്മുടെ അനുദിന ജീവിതത്തിലെയും പ്രവർത്തനങ്ങളെക്കുറിച്ചും ആത്മാവിന്റെ നിമന്ത്രണങ്ങൾക്ക് കൂടുതൽ കാതോർക്കേണ്ടതിന്റെ ആവശ്യകതയെക്കുറിസിച്ചും കൂടുതൽ ധ്യാനിക്കുന്നത് എന്തുകൊണ്ടും ഉചിതമാണ്.
പന്തക്കുസ്താ അനുഭവം
സഭയിൽ പരിശുദ്ധാത്മാവിന്റെ രൂപാന്തരീകരണശക്തിയുടെ ഏറ്റവും ശ്രേഷ്ഠമായ ആഘോഷമായാണ് പന്തക്കുസ്ത കണക്കാക്കപ്പെടുന്നത്. ത്രിത്വത്തിലെ മൂന്നാമത്തെ വ്യക്തി അപ്പോസ്തലന്മാരുടെ മേൽ തീനാവുകളായി ഇറങ്ങി എല്ലാ ദേശങ്ങളിലും സുവിശേഷം പ്രഘോഷിക്കാൻ അവരെ ശക്തരാക്കിയ ഒരു ദൈവിക അനുഭവത്തെ അത് അടയാളപ്പെടുത്തുന്നു. അപ്പസ്തോല പ്രവത്തികൾ രണ്ടാം അധ്യായത്തിൽ രേഖപ്പെടുത്തിയിരിക്കുന്ന ഈ നിർണായക സംഭവം അടിസ്ഥാനപരമായി സഭ എന്നത് കേവലം മനുഷ്യ സ്ഥാപിതമായ ഒന്നല്ല, മറിച്ച് ദൈവത്താൽ സ്ഥാപിക്കപ്പെട്ട് ദൈവികമായി നയിക്കപ്പെടുന്ന ഒരു സമൂഹമാണ് അത് എന്ന യാഥാർഥ്യം നമ്മെ ഓർമ്മപ്പെടുത്തുന്നു. സെഹിയോൻ ഊട്ടുശാലയിലെ പന്തക്കുസ്താ ദിനത്തിലെന്നതുപോലെ ഇന്നും പരിശുദ്ധാത്മാവ് സഭയെ പ്രചോദിപ്പിക്കുകയും നയിക്കുകയും വിശുദ്ധീകരിക്കുകയും ചെയ്യുന്നു. സഭയുടെ രണ്ടു സഹസ്രാബ്ദത്തിലെ ചരിത്രത്തിലൂടെ കടന്നുപോകുമ്പോൾ, സഭയുടെ ഗതിയെ രൂപപ്പെടുത്തിയ, അതിന്റെ വളർച്ചയെ അടയാളപ്പെടുത്തിയ എണ്ണമറ്റ വിശ്വാസികൾ പരിശുദ്ധാത്മാവിന്റെ മൃദുശബ്ദങ്ങളും അഗാധമായ പ്രചോദനങ്ങളും അനുഭവിക്കുകയും അതിനോട് വിശ്വാസത്തോടും അനുസരണത്തോടും കൂടെ പ്രതികരിക്കുകയും ചെയ്തിട്ടുണ്ട്. ദൈവിക പദ്ധതിയോടുള്ള കന്യാമറിയത്തിന്റെ ആത്മാർത്ഥമായ "സമ്മതം" മുതൽ, അപ്പോസ്തലന്മാരുടെ മിഷനറി യാത്രകളും, നൂറ്റാണ്ടുകളിലുടനീളമുള്ള വിശുദ്ധരുടെ മിസ്റ്റിക്കൽ അനുഭവങ്ങളിലൂടെയും, സഭാപിതാക്കന്മാരുടെ ധീരമായ സമർപ്പണത്തിലൂടെയും തുടങ്ങി, സഭയുടെ ചരിത്രത്തിൽ പരിശുദ്ധാത്മാവിന്റെ പ്രചോദനങ്ങളും മാർഗ്ഗനിർദ്ദേശങ്ങളും, സംസ്കാരങ്ങളിലൂടെയും നൂറ്റാണ്ടുകളിലൂടെയും വിശ്വാസത്തിന്റെ ഊടും പാവും നെയ്തെടുക്കുന്ന അദൃശ്യമായ ഇഴയാണ്.
പരിശുദ്ധാത്മാവിന്റെ പ്രവർത്തനത്തിന് തിരുവെഴുത്തിന്റെ സാക്ഷ്യം.
വിശ്വാസികളെ സത്യത്തിന്റെ പൂർണ്ണതയിലേക്ക് നയിക്കുകയും ശുശ്രൂഷയ്ക്കായി അവരെ ശാക്തീകരിക്കുകയും ചെയ്യുന്ന പരിശുദ്ധാത്മാവിനെ പുതിയനിയമം ശ്രേഷ്ഠമായ ദിവ്യ വഴികാട്ടിയായി അവതരിപ്പിക്കുന്നു. ഈശോ തന്നെ തന്റെ ശിഷ്യന്മാർക്ക് സഹായകനായും ഗുരുവായും ആശ്വാസകനായും ആത്മാവ് വരുമെന്നും അവരോടൊപ്പം എന്നേക്കും വസിക്കുമെന്നും വാഗ്ദാനം ചെയ്തിട്ടുണ്ട്. ഈ വാഗ്ദാനം പന്തക്കുസ്തായിൽ പൂർത്തിയായി. സാധാരണ മത്സ്യത്തൊഴിലാളികളും ചുങ്കക്കാരും വാക്ചാതുര്യമുള്ള സുവിശേഷ പ്രഘോഷകരായി, അവർ ഒരിക്കലും പഠിക്കാത്ത ഭാഷകളിൽ സംസാരിക്കുകയും സകല ജനങ്ങളോടും ദൈവത്തിന്റെ വൻകാര്യങ്ങൾ പ്രഖ്യാപിക്കുകയും ചെയ്തു. അപ്പസ്തോല പ്രവർത്തികൾ പതിനഞ്ചാം അധ്യായത്തിൽ പ്രതിപാദിക്കുന്ന ജെറുസലേം കൗൺസിൽ പരിശുദ്ധാത്മാവിന്റെ പ്രത്യേക പ്രചോദനത്തിലും നിയന്ത്രണത്തിലും ഉള്ളതായിരുന്നുവെന്ന് വചനം പറയുന്നുണ്ട് (അപ്പ. പ്രവ: 15:8,28). സങ്കീർണ്ണമായ ദൈവശാസ്ത്രപരവും അജപാലനപരവുമായ പ്രശ്നങ്ങളിൽ സഭ ദൈവത്തിന്റെ ഇഷ്ടം എങ്ങനെ തിരിച്ചറിഞ്ഞു എന്നതിന്റെ ഒരു മാതൃകയായി ഈ സമ്മേളനം മാറി. മനുഷ്യന്റെ യുക്തിയും ദൈവിക പ്രചോദനവും തമ്മിലുള്ള കൃത്യമായ യോജിപ്പ് ഇവിടെ നമുക്ക് കാണാം. അപ്പസ്തോല പ്രവത്തികളിലെ എട്ടാം അധ്യായത്തിൽ വിവരിക്കുന്ന എത്യോപ്യൻ ഷണ്ഡനുമായുള്ള ഫീലിപ്പോസിന്റെ കൂടിക്കാഴ്ച സുവിശേഷ പ്രഘോഷണത്തിൽ പരിശുദ്ധാത്മാവിന്റെ മാർഗ്ഗനിർദ്ദേശങ്ങൾ എത്ര പ്രധാനമാണെന്ന് നമ്മെ പഠിപ്പിക്കുന്നു. രഥത്തെ സമീപിക്കാൻ ആത്മാവ് ഫിലിപ്പിനോട് പ്രത്യേകമായി നിർദ്ദേശിച്ചു. ഇത് പിന്നീട് ഷണ്ഡന്റെ മാനസാന്തരത്തിലേക്കും ജ്ഞാനസ്നാനത്തിലേക്കും നയിച്ച ഒരു സംഭാഷണത്തിലേക്ക് വഴിതെളിച്ചു. സുവിശേഷം പ്രഘോഷിക്കാൻ, ശരിയായ സമയത്ത്, ശരിയായ സ്ഥലത്ത്, ശരിയായ വ്യക്തികളെ നയിക്കുന്നതിലൂടെ, പരിശുദ്ധാത്മാവ് ദൈവിക നിയോഗങ്ങൾ എങ്ങനെ ക്രമീകരിക്കുന്നുവെന്ന് ഈ സംഭവം പ്രകടമാക്കുന്നു.
പരിശുദ്ധ മറിയത്തിന്റെ ആത്മസമർപ്പണം: പരിശുദ്ധാത്മഹിതത്തിന് കീഴടങ്ങുന്നതിന്റെ പരമോന്നത ഉദാഹരണം
പരിശുദ്ധാത്മാവിന്റെ പ്രചോദനങ്ങൾക്കും നിയന്ത്രണങ്ങൾക്കും കീഴടങ്ങുന്നതിന്റെ വിശുദ്ധ ഗ്രന്ഥത്തിലെ ഏറ്റവും ആഴമേറിയ ഉദാഹരണമാണ് ഗബ്രിയേൽ മാലാഖയോടുള്ള കന്യാമറിയത്തിൻറെ പ്രതികരണം. അത്യുന്നതന്റെ ശക്തിയാൽ താൻ ഗർഭം ധരിക്കുമെന്ന് മറിയത്തോട് മാലാഖ പറഞ്ഞപ്പോൾ, മറിയത്തിന്റെ പ്രതികരണം ഏറ്റവും ലളിതവും എന്നാൽ ആത്മാർത്ഥവും ആയിരുന്നു: "നിന്റെ വചനം എന്നിൽ നിറവേറട്ടെ". ഈ സ്വയം സമർപ്പണം, പരിശുദ്ധാത്മാവിനോടുള്ള സഹകരണം, ഈ നിരുപാധികമായ "സമ്മതം", ദൈവത്തിന്റെ മനുഷ്യാവതാരത്തിലേക്കും മനുഷ്യരാശിയുടെ മുഴുവൻ വീണ്ടെടുപ്പിലേക്കും വാതിൽ തുറന്നു. മറിയത്തിന്റെ ഈ "സമ്മതം", ഒരു നിഷ്ക്രിയമായ കീഴടങ്ങൽ മാത്രമല്ല, ദൈവത്തിൻറെ പദ്ധതിയുമായുള്ള സജീവമായ സഹകരണമായിരുന്നു. സാമൂഹിക അപകടസാധ്യതകൾ, കിട്ടാവുന്ന നിന്ദാപമാനങ്ങൾ, തിരസ്കരണം, യഹൂദ നിയമത്തിന് കീഴിലുള്ള മരണം പോലും വിധിക്കപ്പെടാവുന്ന സാഹചര്യം - എല്ലാം മനസ്സിലാക്കിയിട്ടും, ദൈവത്തിന്റെ ഇഷ്ടത്തിനും പരിശുദ്ധാത്മാവിന്റെ പ്രചോദനത്തിനും നിയന്ത്രണത്തിനും അവൾ പൂർണ്ണമായും സമർപ്പിച്ചു. ആത്മാവിന്റെ പ്രവർത്തനത്തിലേക്ക് സ്വയം തുറന്നുകൊടുക്കുന്നതിനുള്ള ക്രിസ്തു ശിഷ്യന്റെ തികഞ്ഞ മാതൃകയായി മറിയത്തെ സഭ എന്നും കണക്കാക്കുന്നത് അതുകൊണ്ടാണ്. വ്യക്തിപരമായ നഷ്ടങ്ങളോ, കഷ്ടപ്പാടുകളോ ആശ്വാസമോ പരിഗണിക്കാതെ ദൈവത്തിന്റെ ഇഷ്ടങ്ങൾ പൂർണ്ണമായും നിറവേറ്റുന്നവരിലൂടെയാണ് ആത്മാവിന്റെ ഏറ്റവും വലിയ പ്രവൃത്തികൾ പ്രാവർത്തികമാകുന്നത് എന്ന് മറിയത്തിന്റെ ഉദാഹരണം നമ്മെ പഠിപ്പിക്കുന്നു.
അപ്പൊസ്തലന്മാർ: ഭയത്തിൽ നിന്ന് ധൈര്യത്തിലേക്ക്
ഭയചകിതരും ആശയക്കുഴപ്പത്തിലുമായ വെറും ശിഷ്യന്മാരിൽ നിന്ന് ധീരരും ഉത്സാഹികളും വാക്ചാതുര്യമുള്ളവരുമായ നേതാക്കളായി ഉള്ള അപ്പോസ്തലന്മാരുടെ മാറ്റം, ആത്മാവിനെ ഉൾക്കൊള്ളുന്ന മനുഷ്യന് സംഭവിക്കുന്ന പരിവർത്തനത്തിന്റെ ഏറ്റവും ഉത്കൃഷ്ടമായ ഉദാഹരണങ്ങളിലൊന്നാണ്. പന്തക്കുസ്തായ്ക്ക് മുമ്പ്, ഈ മനുഷ്യർ ഈശോയെ കുരിശിൻ ചുവട്ടിൽ ഉപേക്ഷിച്ചു, പത്രോസ് തന്റെ ഗുരുവിനെ മൂന്ന് തവണ നിഷേധിച്ചു, പിന്നെയവർ തങ്ങളുടെ പഴയ ജീവിത തൊഴിലുകളിലേക്ക് തിരിച്ചു പോയി. പക്ഷേ, അമ്പത് ദിവസങ്ങൾക്ക് ശേഷം, ഇതേ വ്യക്തികൾ തങ്ങളുടെ നാഥനെ ക്രൂശിച്ച അതേ അധികാരികൾക്ക് മുന്നിൽ എഴുന്നേറ്റുനിന്നു, ഈശോയുടെ പുനരുത്ഥാനം ധീരമായി പ്രഖ്യാപിക്കുകയും, ഭീഷണികളും, പീഡകളും, ശിക്ഷകളും ഉണ്ടായിരുന്നിട്ടും, നിശബ്ദത പാലിക്കാൻ വിസമ്മതിക്കുകയും ചെയ്തു. അപ്പോസ്തോല പ്രവൃത്തികൾ രണ്ടാം അധ്യായത്തിൽ രേഖപ്പെടുത്തിയിട്ടുള്ള പന്തക്കുസ്താ ദിനത്തിലെ പത്രോസിന്റെ പ്രഭാഷണം, അദ്ദേഹത്തിന് ധൈര്യവും വാഗ്മിത്വവും നൽകുന്നതിൽ ആത്മാവിന്റെ പ്രവർത്തനത്തെ പ്രകടമാക്കുന്നു. ഒരു വേലക്കാരി പെൺകുട്ടിയെ പോലും ഭയപ്പെട്ടിരുന്ന അതേ പത്രോസ് ഇപ്പോൾ ആയിരക്കണക്കിന് ആളുകൾക്ക് മുന്നിൽ നിന്ന്, തിരുവെഴുത്തുകൾ അധികാരത്തോടെ ഉദ്ധരിക്കുകയും ഒരു ദിവസം കൊണ്ട് മൂവായിരം മനുഷ്യരെ വിശ്വാസത്തിലേക്ക് നയിക്കുകയും ചെയ്തു. ആത്മാവ് വിശ്വാസികളെ നയിക്കുക മാത്രമല്ല, അവരുടെ ജീവിതത്തെയും കഴിവുകളെയും അടിസ്ഥാനപരമായി മാറ്റുകയും ചെയ്യുന്നതെങ്ങനെയെന്ന് ഈ പരിവർത്തനം വ്യക്തമാക്കുന്നു.
ക്രിസ്ത്യാനികളുടെ പീഡകനായിരുന്ന സാവൂൾ പൗലോസായി മാറിയതും, സഭയുടെ ഏറ്റവും തീക്ഷ്‌ണതയുള്ള മിഷനറി ആയി മാറിയതും, സഭയെ കെട്ടിപ്പടുക്കുന്നതിൽ പത്രോസിനോടൊപ്പം മുഖ്യ പങ്കു വഹിച്ചതും ഇതേ പരിശുദ്ധാത്മ ശക്തിയാൽ തന്നെ. ഈ സമൂലമായ പരിവർത്തനങ്ങൾ മനുഷ്യപ്രകൃതിയെയും അവന്റെ പ്രവർത്തനങ്ങളെയും ദൈവത്തിന്റെ മഹത്തായ ലക്ഷ്യങ്ങളിലേക്ക് നയിക്കാനുള്ള ആത്മാവിന്റെ ശക്തിയെ പ്രകടമാക്കുന്നു.
വിശുദ്ധർ: പരിശുദ്ധാത്മാവിനാൽ നയിക്കപ്പെട്ട യാനങ്ങൾ
പരിശുദ്ധാത്മാവിന്റെ പ്രചോദനങ്ങളോടും മാർഗ്ഗനിർദേശങ്ങളോടുമുള്ള അഗാധമായ സംവേദനക്ഷമതയുടെ ഉത്തമഉദാഹരണങ്ങളായ വിശുദ്ധരെക്കൊണ്ട് സഭയുടെ ചരിത്രം സമ്പന്നമാണ്. "എടുത്തു വായിക്കുക" എന്ന് പറയുന്ന ഒരു കുട്ടിയുടെ ശബ്ദം ഹിപ്പോയിലെ വിശുദ്ധ അഗസ്റ്റിൻ കേട്ടു. അതനുസരിച്ച് വിശുദ്ധഗ്രന്ഥം തുറന്ന് വായിച്ചതുമുതൽ ദൈവികമായ അദ്ദേഹത്തിന്റെ ജീവിത രൂപാന്തരീകരണം ആരംഭിച്ചു. സഭയുടെ ആഴമായ ദൈവശാസ്ത്ര പാരമ്പര്യത്തിന് അദ്ദേഹമായിരുന്നു തുടക്കമിട്ടത്. "ഫ്രാൻസിസ്, തകർന്നുകിടക്കുന്ന എന്റെ ഭവനം പുനർനിർമ്മിക്കുക" എന്ന് ക്രൂശിൽ നിന്ന് ക്രിസ്തു തന്നോട് സംസാരിക്കുന്നത് അസീസിയിലെ ഫ്രാൻസിസ് കേട്ടു. ഇത്, സാൻ ദാമിയാനോയിലെ തകർന്നുകിടന്ന ഒരു കപ്പേളയുടെ ഭൗതിക പുനഃസ്ഥാപനമാണെന്ന് തുടക്കത്തിൽ കരുതിയ വിശുദ്ധ ഫ്രാൻസിസ്, പിന്നീട് ഇത് മുഴുവൻ സഭയെയും പരിഷ്കരിക്കാനുള്ള പരിശുദ്ധാത്മ ആഹ്വാനമായി മനസ്സിലാക്കി. സമൂലമായ ദാരിദ്ര്യത്തോടുള്ള അദ്ദേഹത്തിന്റെ ആലിംഗനവും സുവിശേഷത്തോടുള്ള അദ്ദേഹത്തിന്റെ പ്രതിബദ്ധതയും സഭയെ ആകമാനം ഇന്നും സ്വാധീനിക്കുന്ന ഒരു നവീകരണ പ്രസ്ഥാനത്തിന് കാരണമായി. 1946-ൽ വാർഷിക ധ്യാനത്തിനായി കൊൽക്കത്തയിൽ നിന്ന് ഡാർജിലിംഗിലേക്ക് ട്രെയിനിൽ യാത്ര ചെയ്യുന്നതിനിടെ, വിശുദ്ധ മദർ തെരേസ, പിന്നീട് അവർ "വിളിയ്ക്കുള്ളിലുള്ള വിളി" എന്ന് വിശേഷിപ്പിച്ച ഒരു ആഴമേറിയ പരിശുദ്ധാത്മ നിമന്ത്രണം ശ്രവിച്ചു. ദൈവാത്മാവിൽ നിന്നുള്ള ഈ പ്രചോദനം അവരിൽ വരുത്തിയ മാറ്റങ്ങൾ പിന്നീട് ലോകമെങ്ങും കാരുണ്യപ്രവർത്തനങ്ങളുടെ അമ്മയായി അവർ അറിയപ്പെടുന്നതിന് കാരണമായി; ജീവകാരുണ്യ പ്രവർത്തനങ്ങളിൽ അവർ സഭയുടെ മുഖമായി. അങ്ങനെ സഭയുടെ ചരിത്രത്തിൽ വിവാദങ്ങളുടെയും ഭിന്നിപ്പിന്റെയും സമയങ്ങളിൽ പോലും, സഭയെ സത്യത്തിലേക്കും ഐക്യത്തിലേക്കും നയിക്കാൻ ആത്മാവ് നിരന്തരം പ്രവർത്തിക്കുന്നതായി നമുക്ക് മനസ്സിലാക്കാൻ കഴിയും .
ഇന്ന് ആത്മാവിന്റെ ശബ്ദം എങ്ങനെ തിരിച്ചറിയാം?
വർത്തമാന ലോകത്തിൽ ആത്മാവിന്റെ നിമന്ത്രണങ്ങളും പ്രചോദനങ്ങളും മാർഗ്ഗനിർദ്ദേശങ്ങളും തിരിച്ചറിയാൻ പഠിക്കുക്കുക എന്നത് എല്ലാ വിശ്വാസികൾക്കും സഭാ സമൂഹങ്ങൾക്കും മുന്നിലുള്ള ഒരു വെല്ലുവിളിയും ഉത്തരവാദിത്വവുമാണ്. പരിശുദ്ധാത്മാവിന്റെ വാക്കുകൾ പലപ്പോഴും നാടകീയമായ ദർശനങ്ങളായോ, ഭൗതിക കർണ്ണങ്ങൾക്ക് ശ്രവിക്കാവുന്ന വാക്കുകളായോ വരുന്നില്ല, മറിച്ച് മൃദുവായ മന്ത്രണങ്ങളായും, വളരുന്ന ബോധ്യങ്ങളായും, അല്ലെങ്കിൽ നമുക്കു മുമ്പിൽ തുറക്കുന്നതോ അടയ്ക്കുന്നതോ ആയ വാതിലുകളായും വരുന്നു. പ്രാർത്ഥനയിലൂടെയും വചന വായനയിലൂടെയും ധ്യാനത്തിലൂടെയും സഭയുടെ കൂദാശകളിലുള്ള പങ്കാളിത്തത്തിലൂടെയും ദൈവവുമായുള്ള ആഴത്തിലുള്ള ബന്ധം വളർത്തിയെടുക്കുക എന്നതാണ് ഈ വിവേചനത്തിൻറെ താക്കോൽ. ഒച്ചപ്പാടുകൾ നിറഞ്ഞ ഈ ആധുനിക ലോകത്തിൽ നിശബ്ദതയുടെ മൂല്യം നാം ഇനിയും തിരിച്ചറിയണം; നിശബ്ദതയുടെ ഉൽക്കരുത്തിൽ മാത്രമേ, ഈ പരിശുദ്ധാത്മനിമന്ത്രണങ്ങൾ നമുക്ക് ശ്രവിക്കാനാവൂ. വിശുദ്ധ ഇഗ്‌നേഷ്യസ് ലയോളയും കുരിശിന്റെ വിശുദ്ധ യോഹന്നാനും തുടങ്ങിയ വിശുദ്ധർ നമ്മെ പഠിപ്പിച്ച ഈ ആത്മീയ സാധനയുടെ പാരമ്പര്യം ആത്മാവിന്റെ ചലനങ്ങളെ തിരിച്ചറിയുന്നതിനുള്ള പ്രായോഗിക ജ്ഞാനം നമുക്ക് നൽകുന്നു. ഈ വിവേചനം പ്രാവർത്തികമാക്കുന്നതിന് സാമൂഹിക ജ്ഞാനവും ആവശ്യമാണ്. പ്രാർത്ഥനയിലൂടെയും ചർച്ചയിലൂടെയും ആത്മാവിന്റെ മാർഗ്ഗനിർദേശം തേടി ആദിമ സഭ കൂട്ടായി തീരുമാനങ്ങൾ എടുക്കുമ്പോൾ, പക്വതയുള്ള ക്രിസ്ത്യാനികളുടെയും ആത്മീയ ഗുരുക്കൻമാരുടെയും സഭാ പിതാക്കന്മാരുടെയും ഉപദേശം തേടുന്നതിലൂടെ വർത്തമാനകാലത്തെ വിശ്വാസികൾക്ക് ഈ വിവേചനം ലഭിക്കുന്നു.
ആത്മാവിന്റെ ഫലങ്ങൾ
വ്യക്തികളും സമൂഹങ്ങളും പരിശുദ്ധാത്മാവിന്റെ പ്രചോദനങ്ങളുമായി സഹകരിക്കുമ്പോൾ, അതിന്റെ ഫലങ്ങൾ സഭയെയും ലോകത്തെയും പരിവർത്തനം ചെയ്യുന്നു. ആത്മാവിന്റെ ഫലങ്ങളായ സ്നേഹം, ആനന്ദം, സമാധാനം, ക്ഷമ, ദയ, നന്മ, വിശ്വസ്തത, ആത്മസംയമനം, എന്നിവ വ്യക്തിപരമായ സ്വഭാവത്തിലും സമൂഹ ജീവിതത്തിലും പ്രകടമാകുകയും ചെയ്യുന്നു. മനുഷ്യന്റെ ജ്ഞാനത്താലോ, ശക്തിയാലോ, സ്ഥാപനപരമായ കെട്ടുറപ്പിനാലോ അല്ല, മറിച്ച് പരിശുദ്ധാത്മാവിന്റെ ശക്തിയിലൂടെയും മാർഗനിർദേശത്തിലൂടെയുമാണ് സഭ നിലനിൽക്കുന്നതെന്ന് ആദിമ സഭയുടെ ചരിത്രം നമ്മെ ഓർമ്മിപ്പിക്കുന്നു. പരിശുദ്ധ മറിയത്തിന്റെ നിയോഗം മുതൽ ചരിത്രത്തിലുടനീളം ആത്മാവിന്റെ മാർഗനിർദേശം പിന്തുടർന്ന അപ്പൊസ്തലന്മാരുടെയും അസംഖ്യം വിശുദ്ധരുടെയും ജീവിതാനുഭവങ്ങൾ തുടങ്ങി, സഭയുടെ പ്രയാണത്തിൽ ഉടനീളം ഈ പരിശുദ്ധാത്മ നേതൃത്വം ഇടതടവില്ലാതെ തുടരുന്നു.
ആത്മാവിന്റെ നിമന്ത്രണങ്ങൾ കേൾക്കാൻ ക്ഷമയും, എളിമയും ഒപ്പം പരിശീലനവും ആവശ്യമാണ്. നിശബ്ദതയ്ക്കും പ്രാർത്ഥനയ്ക്കും ഇടം സൃഷ്ടിക്കുക, തുറന്ന മനസ്സോടെ തിരുവചനം പഠിക്കുക, സഭയുടെ ആരാധനാക്രമത്തിലും കൂദാശകളിലും സജീവമായി പങ്കെടുക്കുക എന്നിവയാണ് അതിന്റെ മാർഗ്ഗം. ദൈവത്തിന്റെ വിളി അപ്രതീക്ഷിത ദിശകളിലേക്ക് നയിക്കുകയോ, ബുദ്ധിമുട്ടേറിയ ഒരു ത്യാഗം ആവശ്യപ്പെടുകയോ ചെയ്യുമ്പോൾ പോലും, പരിശുദ്ധ അമ്മയെ പോലെ "സമ്മതം" എന്ന് പറയാൻ തയ്യാറായിരിക്കുക എന്നാണ് ഇതിനർത്ഥം. പന്തക്കുസ്താ ദിനത്തിൽ പ്രകടിപ്പിച്ച അതേ ശക്തിയോടും ജ്ഞാനത്തോടുംകൂടി പരിശുദ്ധാത്മാവ് ഇന്നും സഭയെ നയിക്കുന്നു.
വിശ്വാസികൾ വ്യക്തിപരമായും സമൂഹമായും ആത്മാവിന്റെ മാർഗ്ഗനിർദേശങ്ങളുമായി സഹകരിക്കാൻ ശ്രമിക്കുമ്പോൾ, അവർ ദൈവത്തിന്റെ രക്ഷയുടെയും രൂപാന്തരീകരണത്തിന്റെയും ഈ ലോകത്തിൽ തുടരുന്ന പ്രവർത്തനത്തിൽ പങ്കുചേരുന്നു. സഭയുടെ ഏറ്റവും മഹത്തായ ദിവസങ്ങൾ ഭൂതകാലത്തിലല്ല, ഭാവിയിലാണ്, കാരണം ദൈവാത്മാവ് 'ക്രിസ്തുവിന്റെ ശരീരത്തെ' സ്വർഗ്ഗത്തിലെന്നപോലെ ഭൂമിയിലെയും ദൈവരാജ്യത്തിന്റെ പൂർണ്ണതയിലേക്ക് ഇപ്പോഴും നയിച്ചു കൊണ്ടിരിക്കുന്നു.
